काठमाडौं: अस्ट्रेलियाको सिड्नीमा कारको ठक्करबाट एक १६ महिनाका बालकको ज्यान गएको छ । 

सिकारू व्यक्तिले चलाएको कारको ठक्करबाट बिहीबार विहान साढे ९ बजे नेपाली बस्ती नजिकै सिड्नीको अवर्नमा फुटपाथमा हजुरआमासँग हिँडिरहेका १६ महिनाका नेपाली बालक श्रेयन थापाको ज्यान गएको अस्ट्रेलियास्थित सञ्चारमाध्यमले जनाएका छन् । 

हजुरआमा मेनुकासँग फुटपाथमा हिँडिरहेका ती बालकलाई सिकारू चालकले हाँकिरहेको कारले ठक्कर दिएको हो । 

श्रेयनलाई कारले ठक्कर दिँदा उनका बाबु सुजन र आमा रोजिता घटनास्थलबाट नजिकैको दुरीमा थिए ।                                                              ५० वर्षीय सिकारु चालकले चलाएको कारले नेपाली बालकको ज्यान गएपछि प्रहरीले त्यसबारेमा आवश्यक अनुसन्धान अघि बढाएको छ । 

नाबालक छोराको ज्यान गएपछि थापा परिवार शोकमा डुबेका छन् । श्रेयनका बुवाले परीक्षाको तयारी गर्दैगर्दा बालक हजुरआमासँग घुम्न निस्केको बेला यो घटना भएको हो ।घटनापछि तत्कालै प्रहरी र चिकित्सकले बालकलाई बचाउन प्राथमिक उपचार गरेका थिए । 

स्थानीय अस्पतालकी नर्स मोरियम जेरिकाले दिएको जानकारी अनुसार घटना भएपछि चिकित्सक र उनी पनि घटनास्थलमा पुगेका थिए । 

'घटना थाहा पाउनेबित्तिकै हामी दौडँदै घटनास्थलमा पुग्यौं,' उनले भनिन्, 'बालकलाई तत्कालै चेकजाँच गरेँ । धड्कन छाम्दा बन्द थियो । श्वास दिएर बचाउने कोशिस गरेँ तर सफल हुन सकिनँ ।'