सोही परीक्षा केन्द्रमै चार महिनाको छोरो लिएर परीक्षा दिदँैछिन्, जनकल्याण मावि गुर्जाकी दिलकुमारी छन्त्याल । १९ वर्षीया दिलकुमारीको एकवर्षअघि गाउँमै विवाह भएको हो ।

‘छोरो भएपनि पढ्नुपर्छ भन्ने लागेको छ’, उनले भनिन्, ‘बच्चालाई हेरचाह गर्दागर्दै घरमा खासै पढ्न पाइँदैन । प्रश्न हल गर्न समय पनि पुग्दैन । सरहरुले केही समय थप गर्नुहुन्छ ।’

बच्चालाई दुध चुसाउँदै परीक्षा दिइरहेका यी विद्यार्थी आमाहरुको अवस्थाले जिल्लामा बालविवाहका डरलाग्दो तस्बिर देखाउँछ । समाजमा चेतनाको कमी हुनु, लहैलहैमा लाग्नु र सानै उमेरमा प्रेम सम्बन्धमा फस्नु जस्ता कारणले प्रतिक्षा, तकमकुमारी र दिलकुमारी जस्ता विद्यार्थीले कम उमेरमै विवाह गरेका हुन् ।

हेम उच्च मावि स्रोत केन्द्रका स्रोतव्यक्ति गिरिप्रसाद छन्त्यालले घरपरिवारको स्वीकृतिबिना नै कक्षा ९ र १० का विद्यार्थीले विवाह गर्ने गरेको बताए ।

‘विद्यालयमा शिक्षक र घरमा बाबुआमाको स्वीकृती हुँदैन, तैपनि उनीहरु भागेर जान्छन्’, उनले भने, ‘सानै उमेरमा एकअर्कालाई मन पराएपछि अरु कुराको ध्यानै हुँदोरहेनछ । यो क्षेत्रमा विगत वर्षमा भन्दा बालविवाह धेरै कम भएको छ ।’

कक्षा ८ देखि माथिका विद्यार्थीले छिट्टै विवाह गर्ने र बच्चा जन्माउने क्रम धेरै रहेको पाइएको छ ।

‘एउटै कक्षाका विद्यार्थी विवाह गर्छन्, अनि सँगै स्कुल आउँछन्’, स्रोतव्यक्ति छन्त्यालले भने, ‘विवाह गरेपनि बच्चा नजन्माउनु भन्छौ, तर यो क्रम पूर्ण रुपमा रोकिएको छैन ।’

0 comments

प्रतिक्रिया दिनुहोस्...